ฯ นโม ตสฺส ภควโต อรหโต สมฺมาสมฺพุทฺธสฺสฯ
วินยวินิจฺฉโย
คนฺถารมฺภกถา
[1]
วนฺทิตฺวา สิรสา เสฏฺฐํ, พุทฺธมปฺปฏิปุคฺคลํ;
ภวาภาวกรํ ธมฺมํ, คณญฺเจว นิรงฺคณํฯ
[2]
ภิกฺขูนํ ภิกฺขุนีนญฺจ, หิตตฺถาย สมาหิโต;
ปวกฺขามิ สมาเสน, วินยสฺสวินิจฺฉยํฯ
[3]
อนากุลมสํกิณฺณํ, มธุรตฺถปทกฺกมํ;
ปฏุภาวกรํ เอตํ, ปรมํ วินยกฺกเมฯ
[4]
อปารํ โอตรนฺตานํ, สารํ วินยสาครํ;
ภิกฺขูนํ ภิกฺขุนีนญฺจ, นาวาภูตํ มโนรมํฯ
[5]
ตสฺมา วินยนูปายํ, วินยสฺสวินิจฺฉยํ;
อวิกฺขิตฺเตน จิตฺเตน, วทโต เม นิโพธถฯ
ภิกฺขุวิภงฺโค
ปาราชิกกถา
ปฐมปาราชิกกถา
[6]
ติวิเธ ติลมตฺตมฺปิ, มคฺเค เสวนเจตโน;
องฺคชาตํ ปเวเสนฺโต, อลฺโลกาเส ปราชิโตฯ
[7]
ปเวสนํ ปวิฏฺฐํ วา, ฐิตมุทฺธรณมฺปิ วา;
สสิกฺโข สาทิยนฺโต โส, ฐเปตฺวา กิริยํ จุโตฯ
[8]
สนฺถเตนงฺคชาเตน, สนฺถตํ วา อสนฺถตํ;
มคฺคํ ปน ปเวเสนฺโต, ตเถวาสนฺถเตน จฯ
[9]
อุปาทินฺเนนุปาทินฺเน, อนุปาทินฺนเกน วา;
ฆฏฺฏิเต อนุปาทินฺเน, สเจ สาทิยเตตฺถ โสฯ
[10]
โหติ ปาราชิกกฺเขตฺเต, ปวิฏฺเฐ ตุ ปราชิโต;
เขตฺเต ถุลฺลจฺจยํ ตสฺส, ทุกฺกฏญฺจ วินิทฺทิเสฯ
[11]
มเต อกฺขายิเต จาปิ, เยภุยฺยกฺขายิเตปิ จ;
เมถุนํ ปฏิเสวนฺโต, โหติ ปาราชิโก นโรฯ
[12]
เยภุยฺยกฺขายิเต จาปิ, อุปฑฺฒกฺขายิเตปิ จ;
โหติ ถุลฺลจฺจยาปตฺติ, เสเส อาปตฺติ ทุกฺกฏํฯ
[13]
นิมิตฺตมตฺตํ เสเสตฺวา, ขายิเตปิ สรีรเก;
นิมิตฺเต เมถุนํ ตสฺมิํ, เสวโตปิ ปราชโยฯ
[14]
อุทฺธุมาตาทิสมฺปตฺเต, สพฺพตฺถาปิ จ ทุกฺกฏํ;
ขายิตากฺขายิตํ นาม, สพฺพํ มตสรีรเกฯ
[15]
ฉินฺทิตฺวา ปน ตจฺเฉตฺวา, นิมิตฺตุปฺปาฏิเต ปน;
วณสงฺเขปโต ตสฺมิํ, เสวํ ถุลฺลจฺจยํ ผุเสฯ
[16]